Ordensgeschichte
Süstorie – de Geschicht van de Süsters weltwiet
De Wuddels van des Süsters van de Perpetuell Indulgenz rieken bit in de 70er Johr van dat lest Johrhunnert torügg. An d’ Oostersaterdag 1979 sünd de eersten Süsters in San Francisco updükert. Disse Grupp van schwul Keerls harr sük bit in’t Johr 1981 een Naam verdeent. Se hebbt ungewöhnelk Aktionen maakt un weren politisk aktiv, mitdat se an Protestmarsken un Demonstrationen deelnohmen.
1982 fung dat an, dat AIDS sük düchtig utbreden dee. So besloten de „Sisters of Perpetual Indulgence“ unner dat Leit van de utbild Krankenpfleger Sr. Florence Nightmare un Sr. Roz Erection die „Play Fair“ ruttobrengen: de weltwiet eerst Safer-Sex-Bookje, de sexuell-positiv Spraak bruken deit, praktisch Raadslagen för de Präventioon van sexuell to överdragend Süken un Safer-Sex-Praktiken gifft un spaßig is, ohn daarbi de „moraalsch Wiesfinger“ hoog to hollen. AIDS-Arbeid fung an, sük as en Middelpunkt van de „Süsters van de Perpetuell Indulgenz“ ruttokristalliseren. Gliekfalls weren se mit bi de Eerste, de en Benefiz för de domaals noch neei, unbekannt Süük AIDS maakt hebben. To de Tied unner de Schirm van de Schauspölerske Shirley McLaine.
Ut de toeerst „schwul Keerls in en Nunnen-Takelaasje“ hett sük över de Johren dat Utsehn van vandaag entwickelt. Dat woll upfallendst gemeensaam Kennteken is dat rundum witt schminkt Gesicht, kakelbunt anfarvt. Blot mit en paar regionaal Utnahmen sünd all Süsters doraan weer to kennen. Dat rundum witt Gesicht symboliseert de Dood, de aver dör de smaals individuell un vöölklöörig Akzenten dat Leven un de Freid tegensett worden.
Siet 1981 hett sük de Idee van de Sisters of Perpetual Indulgence weltwiet utbreddt. Tegen dat Internationaal Moderhuus in San Francisco gifft dat vandaag in de USA to’n Bispill Husen in Los Angeles, Russian River, Chicago, Baton Rouge, Philadelphia un Seattle. Dat eerst Ordenshuus butenhalv van de USA is in Sydney gründt worden. Van hier ut folgden mehr Husen in all groot Steden in Australien, Neeseeland, Thailand un Indonesien.
Ok in Europa sünd siet 1991 Ordenshuse entstahn, so in Frankriek, Engelland, Schottland, Düütskland, Öösterriek un in de Swiez. Intüsken gifft dat sogaar Ordenshusen in Kolumbien, Chile und Uruguay, wat heel besünners is, denn daar för all Volk as homosexuell uptotreden is immer noch leep gefahrelk.
Upstünds gifft dat weltwiet mehr as 3000 Süsters, de sük de Kamp tegen de Süük AIDS – un natürelk ok all anner sexuell to överdragend Süken – verschreven hebben. Över de Johren sünd dör de internationaal Süsterskupp weltwiet en paar Millionen US-Dollar för HIV- un AIDS-Projekten sammelt worden un Tünnen van Informationsbookjes un en noch groter Bült an Kondomen un anner Safer-Sex-Tüüg wurren to de Minsken brocht.
Un as dat bi Geschichte so is: Se höört nienich up, man leevt stüttig wieder…